Chyum laika sharin hpawng

Dai na de WCC ramma ni a chyum laika sharin hpawng nga ai.
Karai hta myit maju jung let sak hkrung lu hkra Madu hta shingbyi nga ga.

chyum laika sharin ai gaw shata lahkawng laman kalang galaw ai, kalang galaw yang lani mi hkying hkum 3, lahkawng ya re.

yawng shang lawm ga.

Lamu mung ai

Dai ni gaw bungli langai hpe kachyi mi lu shangut kau ai majaw, myit hta loi asan nga ai. Raitim, ya matut galaw ra ai bungli ni mung grai naw nga ai. Shani shagu htaw ra galaw ndai galaw na sha aten gaw lai she lai, asak mung kaba she kaba wa sai.

Dai ni lamu loi katsi na masha mung muk muk nga taw ai.
Mana mung yup tung rai yang mala la she kashung wa ai

gai gai naw hkring la na sai.....

Ahkyak Dik Ai

Anhte a prat hta manu dan dik ai gaw hpa rai? Ga san san wa yang tsaw manang kara hku htai na.

Nkau mi a matu gaw ja gumhpraw da.
Nkau mi a matu gaw hpaji!
Nkau mi rai yang gaw manaw manang!

Ndai zawn tinang manu shadan ai lam gaw n bung ai.

Ndai ga san hpe ngai lama htai yang gaw. Ahkying aten ngu na re.
Anhte a prat hta ahkying aten gaw manu dan dik ai.
Lai mat sai hpe galoi mung nhtang la n mai ai.
Anhte yawng aten hpe shachyut na sak hkrung nga ga ai.
"Lama anhte aten hpe majoi shalai kau ai rai yang, lani mi hta aten mung anhte hpe majoi shalai kau na re", nga tsun da nga ai.
Asak kaji nga ai ten hta aten second mi hpe manu n shadan shalai kau yang, nang asak kung ai ten hta hkying hkum mi jam jau na ra ainga mung sharin da nga ai.

Ya dai ni bai myit yu yang kaja wa nan teng nga ai.

Aten a manu hpe chye ai wa gaw hpaji rawng dik ai wa re.
Aten ahkying kade hpu ai hpe anhte ta tut hta yu yu let, manu tawn chye ga.

Na ntsa ngai mu ai ningmu

Laika n ka ai loi mi na mat ai. Shawoi mung grai ka la ai chyawm gaw n re ai le. Ya mung ngai na blog hpe kabai da ai nau na mat na bai hpaw yu ai shaloi lama mi gaw ka bang da na re ngu myit let, ka byin mat ai rai nga ai. Ga baw hte gaw htap htak na kun!



Dai ni na ten hta ngai mu mada ai ramma law law nga ai. Ramma langai hte langai a sat lawat, ning mu, myit yaw shada ai lam, myit mada ai lam ni gaw n bung nga ai. Gun hpai nga ai magam bungli ni mung shai nga ai sha n'ga, makau gup-yin hte nga kaba wa ai mung kaga ga rai nga ai. Hpaji chye ai ni lawm ai zawn hpaji n chye ai, sut-su ai, matsan ai ni mung law law rai nga ai. Tinang prat hta ra n rawng hkra hpring zup ai ni nga tim, lam shagu ginlut ding hprut ai ni mung law law rai nga ai.

Dai zawn n bung n pre ai ni law law a majaw anhte ramma ni a myit masa ni mung langai hte langai shai mat wa ai rai sam ai. Shai nga ai myit masa hpan masum hpe ngai mu mada ai hku ka mat na nngai.

Hpan langai hta, ngai hpaji chye ra ai, ngai chye yang she ngai bungli lu na. Manang wa, jinghku jing-yu wa hpa byin tim ngai hte n seng ai. Kadai hte mung ngai n kanawn na, ngai hpa galaw tim kadai hte n bawngban ra ai, ngai shakut yang ngai lu na. Ngwi pyaw yang rai sai.

Hpan lahkawng hta, hpa lam hta tim myit tsang chye ai, hkrit ja la ai hte n gwi la ai myit. "Ngai hta hpa atsam rawng ai gaw n rai, yau sai shanhte galaw mu ga". Masha ni hpe hkrai kam masha ni hpang hkrai hkan mayu ai myit.

Hpan masum hta, lam shagu hta woi awn mayu ai myit, shagrit shanem ai myit, myu tsaw mung tsaw ai myit, ningbaw lam hta shang tsap gwi ai myit rawng ai. "Ndai bungli hta ngai nan shang lawm ra ai! ngai nan gunhpai ra ai" nga myit rawng ai.

Ndai myit masa lam amyu myu nga ai hta tinang kara kaw lawm nga ai kun! Kara myit masa gaw kaja ai kun hpe myit maram myit sawn yu ga. Myit lu ai daram mi karan kachyan dat ai.